މާކުރަތު ކައުންސިލް އިދާރާ
ބެލެނިވެރިންގެ ދުވަސް ފާހަގަކުރުމުގެ ގޮތުން މާކުރަތު ސުކޫލުގައި ޚާއްޞަ ހަރަކާތްތަކެއް ހިންގައިފިއެވެ. މިގޮތުން މިދުވަހުގެ ހަރަކާތްތައް ފެށުމުގެ ގޮތުން ފުރަތަމަ ބޭއްވުނީ ޚާއްސަ އެސެމްބުލީއެކެވެ. މިއެސެމްބުލީގެ ހުރިހާ ކަމެއް ކުރިޔަށް ގެންދެވީ ބެލެނިވެރިންނެވެ. އެސެމްބުލީއަށްފަހު ހަވީރު ކުރިޔަށް ގެންދިޔައީ ރަށުގެ ގޮނޑުދޮށާއި، ހޭޅިފަށުން ޕުލާސްޓިކު ސާމާނު އެއްކުރުމުގެ މަސައްކަތެވެ. މި ޕޮރޮގުރާމްގެ މަޤުޞަދަކީ، ރަށުގެ ތިމާވެށިި ޙިމާޔަތްކުރުމަށް ސުކޫލުގެ ބެލެނިވެރިންނާއި މުއައްޒަފުންގެ ފަރާތުން އެހީތެރިކަމެއްވެދިނުމެވެ. އަދިސުކޫލުގެ މުވައްޒަފުންނާއި، ބެލެނިވެރިންގެ މެދުގައި އޮންނަގުޅުން އިތުރަށް ހަރުދަނާކުރުމެވެ. މިހަރަކާތް ކުރިޔަށް ގެންދިޔައީ ބެލެނިވެރިންނާއި ސުކޫލް މުވައްޒަފުން ގުރޫޕްތަކަކަށް ބަހައިލައިގެންނެވެ. ޕޮރޮގުރާމް ނިމުމުން އެންމެ ގިނަތަކެތި އެއްކުރެވުނު ގުރޫޕަތަކަށް އިނާމްދެވިފާވެއެވެ. މިހަރަކާތުގައި ޖުމްލަ 634 ކިލޯގެ ޕުލާސްޓިކުވަނީ އެއްކުރެވިފައެވެ.
